Боно: Добрите вести во врска со сиромаштијата (Да, има добри вести)

Луѓето се бореле против општествената нееднаквост и сиромаштија цели 3,000 години. Но, ваквата борба станува сè по жестока. Боно "допира до својата внатрешна бубалица" и ни споделува инспиративни податоци кои покажуваат дека крајот на екстремната сиромаштија е близу... само ако успееме да го одржиме моменталниот интензитет.

Крис Андерсон ме праша дали би можел да ги сумирам последните 25 години

од активизам против сиромаштијата во 10 минути за TED.

Англичанец бара од Ирец да биде концизен.

(Смеа)

Јас му реков: „Крис, за тоа е потребно чудо.“

Тој рече: “Боно, зарем нема твојот месијански комплекс да биде од корист тука?„

Па, да.

Потоа си помислив, наместо 25, ќе се навратам уште поназад.

Ќе почнам пред Христос, пред три милениуми,

време кога, барем според мене, борбата за правда

и маршот против нееднаквост и сиромаштија навистина започнале.

Пред три илјади години,

со зачеток на цивилизацијата на бреговите од Нил,

некои робови, еврејски овчари во овој случај,

претпоставувам мирисајќи на овчи лајна,

на фараонот кој седел на неговиот престол, му рекле:

„Ние, Височество, сме еднакви со вас.“

А фараонот им одговорил: „Ааа, не.

Вие, ваше проклетство, мора да се зезате со мене.“

А тие му велат: „Не, не, така пишува овде

во нашата света книга.“

Денес во нашиот век, истата земја, истите пирамиди,

други луѓе ја шират истата идеја

за еднаквост преку поинаква книга.

Овој пат таа се вика Фејсбук. (бук=книга)

Толпи се собрани на плоштадот Тахрир.

Тие ја претворија социјалната мрежа од виртуелна во реална

и може да се каже го рестартираа 21от век.

Не сакам да го потценам хаосот и одвратноста

непосредно по „Арапската пролет,"

ниту пак сакам да ја преценам улогата на технологијата,

но овие случувања покажаа што е возможно

кога прастариот модел на моќ, пирамидата,

се превртува наопаку, ставајќи ги луѓето на врвот,

а фараоните од денешницата на дното, како што и се случи.

Ова исто така ни покажа дека нешто толку моќно,

како што е споделувањето информации, може да ја разниша нееднаквоста,

бидејќи фактите, како и луѓето,

сакаат да бидат слободни, а кога се ослободени,

човековата слобода е вообичаено на дофат,

дури и за најсиромашните.

Факти кои му се спротивставуваат на цинизмот

и апатијата кои пак водат до инертност,

факти кои ни кажуваат што функционира

и многу поважно, што не функционира, за да можеме да го поправиме;

факти коишто ако ги чуеме и послушаме можат да ни помогнат

во постигнување на целта која Нелсон Мендела ја постави

во 2005,

кога побара од нас да бидеме таа голема генерација

која ќе ја надмине најужасната навреда кон човештвото,

екстремната сиромаштија -

факти кои стануваат сè посилна движечка сила.

Така, си реков, заборави на рокот,

бомбастичните изрази, моите вообичаени трикови.

Единственото нешто што ќе го пеам денеска се фактите,

бидејќи вистински ја прифатив бубалицата во мене.

Така излегувам од рок ѕвездата.

Влегувам во активистот базиран на докази - фактивист.

Бидејќи фактите ни кажуваат

дека долгата и бавна борба,

човековата долга и бавна борба за еднаквост,

всушност се вжестува.

Погледнете што е постигнато до сега.

Погледнете што ни кажуваат податоците.

Од 2000та па навака, од почетокот на новиот милениум,

бројката на болни од СИДА кои примаат

антиретровирална терапија се зголеми за 8 милиони.

Маларија: Во осум земји од суб-сахарска Африка,

смртната стапка е намалена за 75 проценти.

Кај децата под 5 години, смртната стапка

е намалена за 2.65 милиони годишно.

Односно, секојдневно се спасуваат по 7,256 детски животи.

Уау. Уау. (Аплауз)

Ајде да застанеме за момент и да размислиме за ова.

Дали во текот на изминатата недела, прочитавте

нешто што беше барем приближно толку важно како овој број? Уау.

Одлични вести. Се нервирам

бидејќи повеќето луѓе не го знаат овој факт.

Седум илјади деца на ден. Еве две од нив.

Ова се Мајкл и Бенедикта,

и тие се живи, благодарение воглавно

на Др. Патриша Асамоа - таа е неверојатна -

и на Меѓународниот Фонд кој сите вие финансиски го поддржувате,

без разлика дали сте свесни или не.

А Глобалниот Фонд обезбедува антиретровирални лекови

кои го спречуваат пренесувањето на ХИВ вирусот од мајките на нивните бебиња.

Овие неверојатни работи не се случија сами по себе.

За нив некој се борел, спроведувал кампањи,

создавал иновации.

А овие добри вести раѓаат уште повеќе добри вести,

бидејќи еве ви го историскиот тренд.

Бројот на луѓе кои живеат во најужасна и

екстремна сиромаштија е намален

од 43 проценти од светското население во 1990та

на 33 проценти до 2000та,

а потоа на 21 процент до 2010та.

Еден аплауз за ова. (Аплауз)

Преполовен. Преполовен.

Но, стапката е сè уште превисока - сè уште премногу луѓе

непотребно ги губат своите животи.

Сè уште има работа.

Но ова е зачудувачка ствар.

И ако живееш на помалку од 1.25 долари на ден,

ако живееш во таква сиромаштија,

тогаш ова не се само податоци.

Ова е сè.

Ако сте родител кој го посакува најдоброто за своите деца - а јас сум -

тогаш оваа молскавична транзиција е пат од очај кон надеж.

И погодете што? Ако продолжи овој тренд,

погледнете на колку ќе се намали бројот на луѓе кои живеат со 1,25 долари на ден

до 2030та.

Дали е тоа возможно?

Ете што ни кажуваат податоците. Ако трендот продолжи вака

ќе стигнеме до.. уау.. нулата.

За љубители на бројки, како нас,

тоа е ерогената зона,

и може да се каже дека јас сум, до сега,

сексуално возбуден од податоциве.

Значи, целосно искоренување на екстремната сиромаштија,

дефинирана како луѓе кои живеат со помалку од $1,25 на ден,

коригирана, секако - за инфлацијата од 1990та како основа.

Ние обожаваме добра основа, зарем не?

Тоа е неверојатно.

Некои од вас ќе речат дека овој напредок е само

во Азија или Латинска Америка или

во модел земјите како Бразил -

а кој не сака бразилски модели? -

но погледнете ја суб-сахарска Африка.

Има група од 10 земји - некои ги нарекуваат "лавовите" -

кои во последната деценија успеаја целосно

да го исплатат државниот долг,

добија огромна помош, имаат десетоструко зголемување

на директните странски инвестиции

кои пак предизвикаа четвороструко зголемување на домашните ресурси т.е. локалните пари -

кои, кога потрошени мудро т.е. добра политика -

ја намалија детската смртност за една третина,

ја дуплираа стапката на образованост

и ја преполовија екстремната сиромаштија,

а ако продолжат вака, и овие 10 земји ќе дојдат до нулата.

Значи гордоста на лавовите

е доказ за еден успешен концепт.

Има и други поволности од ова.

За почеток, не ќе морате да ги слушате

неподносливите и по малку арогантни Исуси како мене.

Што велите на тоа? (Аплауз)

А 2028, 2030? Еве ги кај се.

Мислам, уште три проштални концерти на Ролинг Стоунс.

(Смеа) Се надевам.

Нè прави да изгледаме многу млади.

Тогаш зошто не скокаме од радост поради ова?

Па, шансата е реална, но реален е, и ризикот.

Не можеме да успееме во ова, сè додека не прифатиме

дека можеме да успееме.

Погледнете го овој график.

Се вика инерција. Покажува како ја зезнавме работата.

А следниот е навистина убав.

Се вика движечка сила.

Ни покажува како да го свиткаме лакот на историјата

надолу кон нулата,

едноставно правејќи го она што знаеме дека функционира.

Значи инерција наспроти движечка сила.

Постои ризик, и секако,

колку сте поблиску, толку е сè потешко.

Ги знаеме пречките кои се наоѓаат на патот,

сега, во овие тешки времиња.

Всушност, денес во вашиот главен град, некои луѓе кои се загрижени

за чантата на државата, сакаат да ги укинат

програмите кои спасуваат животи, како Глобалниот Фонд.

Но вие можете да сторите нешто околу тоа.

Можете да им кажете на политичарите

дека овие укинувања чинат животи.

Баш сега, во Осло, нафтените компании

се борат да не излезе во јавност, фактот

дека им плаќале пари на владите

за да можат да вадат нафта во неразвиените земји.

И во врска со ова можете да направите нешто.

Можете да се приклучите на "One Campaign" движењето

и на лидерите како Мо Ибрахим, телеком претприемачот.

Ние се бориме за воведување на закони кои ќе осигураат

барем малку од богатството под земја

да заврши во рацете на луѓето кои живеат над него.

А денеска знаеме дека

најголемата болест од сите

не е болест. Тоа е корупцијата.

Но има вакцина и против тоа.

Се вика транспарентност, отворен пристап до податоци,

нешто за што TED заедницата се залага.

Можете да го наречете, транспарентност на дневна светлина.

А технологијата навистина помага во ова.

Сè потешко е да се скриете ако правите лоши работи.

Дозволете ми да ви кажам за ЈУ-извештајот

за кој сум многу возбуден. Се работи за 150,000 млади,

распространети низ Уганда

вооружени со 2ЏИ телефони и со СМС социјална мрежа

која ја открива владината корупција,

ја истражува состојбата во државниот буџет

и воедно како се трошат нивните пари.

Ова е возбудливо.

Видете, откако ќе дојдете до овие алатки,

невозможно е, а да не ги користите.

Штом еднаш го стекнете знаењето, не можете да го однезнаете.

Не можете да ги избришете овие податоци од вашиот мозок,

но можете да го избришете стереотипот

за слаби, сиромашни нации кои се

неспособни да управуваат со своите животи.

Можете да го избришете тоа, навистина можете,

бидејќи повеќе не е така. (Аплауз)

Ова е револуционерно.

2030? До 2030, роботи,

не само ќе што нè служат Гинис пиво, но и ќе го пијат.

Додека да стигнеме до таму,

ќе мораме да се избориме против коруптивните

влади кои ни стојат на патот.

Значи јас сум овде - ние сме овде -

да се обидеме да ве инфицираме со овој виртуозен, вирус базиран на факти,

вирус кој го нарекуваме фактивизам.

Нема да ве убие.

Туку може да спаси неброени животи.

Ние во "One Campaign" движењето би сакале

да бидете заразни, да го ширите, споделувате, да го пренесете.

Преку тоа, ќе ни се приклучите нам и на безброј други

во она што јас верувам е најголемата авантура било кога започната -

постојаната борба за глобална еднаквост.

Дали сме навистина големата генерација

како што рече Мендела?

Можеме ли да одговориме на тој повик со наука

со разум, со факти

и, ќе се осмелам да кажам, со емоции?

Бидејќи како што се гледа и фактивистите имаат чувства.

Впрочем, мислам на Ваел Гоним.

Некои од вас го знаат. Тој ја започна една од фејсбук групите

одговорни за протестот на плоштадот Тахрир во Каиро.

Беше фрлен во затвор поради тоа,

но неговите зборови ги имам истетовирано на мојот мозок.

„Ќе победиме бидејќи ние не се разбираме од политика.

Ќе победиме бидејќи ние не ги играме нивните валкани игри.

Ќе победиме бидејќи ние немаме политичка агенда.

Ќе победиме бидејќи солзите

кои течат од нашите очи всушност течат од нашите срца.

Ќе победиме бидејќи имаме соништа

и спремни сме да застанеме во име на тие соништа.“

Ваел е во право.

Ќе победиме

ако работиме како едно,

бидејќи моќта на луѓето

е многу посилна од онаа на власта.

Ви благодарам.

(Аплауз)

Ви благодарам многу. (Аплауз)