我喺北韓出世 雖然我嘅家庭一直處於貧困狀態 但係我仲係得到屋企人對我嘅關愛 因為我係家中唯一嘅男丁 亦係兩個細路當中細嗰個 但係 1994 嗰年，大饑荒爆發 當時我四歲 我同姐姐一起出去搵柴火 從清晨五點開始 一直到凌晨先返返屋企 我為咗搵嘢食而喺街上遊蕩 我見過一個母親孭住一個細路 個細路喺母親背脊食緊薯仔 我當時想偷佢薯仔 飢餓係虐待人、令人覺得絕望嘅一樣嘢 對於一個受盡飢餓折磨嘅細路嚟講 政治同自由係根本諗都唔使諗 喺我九歲生日嗰日 我嘅父母甚至無辦法畀嘢食我 即使我當時仲好細 我可以感受到父母沉重嘅心 大約有一百萬北韓人因為嗰次饑荒餓死 而喺 2003 年，我 13 歲嗰年 我父親亦成為饑荒嘅受害者 我親眼目睹父親慢慢衰退嘅死亡 喺同一年嘅某日，我嘅母親突然消失咗 然後我姐姐講比我知 母親去咗中國打工搵錢 但係佢會好快帶著金錢同食物返嚟 因為我哋之前從未分開過 而且我覺得我哋會永遠喺埋一齊 於是佢離開嘅時候 我甚至連擁抱過佢都冇 呢個係我生命中犯咗嘅最大錯誤 但係，我當時並唔知道 呢次係我同母親永遠訣別 從嗰時開始 我就一直無見過我家姐同母親 刹時間，我成為一個孤兒，無家可歸 我每日嘅生活變得更加艱難 但係我嘅目標好簡單 就係可以係垃圾堆度 搵到一片好多塵嘅麵包充飢 但係咁樣始終畀唔到我生存落去 我開始意識到，乞討解決唔到問題 所以我嘗試去黑市偷食品車嘅食物 有時候，我會打散工嚟換取食物 有一次，我甚至喺一個煤礦度 工作咗兩個月 位於地底 33 米，無任何保護措施 每日工作 16 個鐘 我嘅情況並唔罕見 好多孤兒都係喺同我相似 或者更加惡劣嘅環境生活 當我因為太凍或者餓壞而瞓唔到嘅時候 我希望第二朝早 姐姐會攞著我鍾意嘅食物叫醒我 呢個希望令我繼續生存落去 我唔係講緊咩偉大嘅希望 我講緊嘅希望係令我相信 可以喺下一堆垃圾度搵到麵包 即使有時真係搵唔到 但係如果我無呢個信念 我連試都唔去試嘅話 我就會死 係希望令我生存 每日，我都話畀自己聽 無論生活點樣艱難，我都要生存落去 經過三年喺度等阿家姐 我決定去中國搵佢 我發現咁樣嘅話我更加冇可能生存到 我明白呢次旅程非常冒險 但係留喺北韓都係一樣賭緊生命 因為我可能會好似我父親一樣 餓死喺北韓 走到中國話唔定我嘅生活會更加好 我之前聽講過 好多人嘗試夜晚偷渡到中國 避過俾人發現 北韓邊境嘅警衛好多時射殺 逃到去中國嘅人 中國士兵會逮捕 同埋送返脫北者畀北韓當局 佢哋返到去北韓會受到嚴厲嘅懲罰 我當時決定日頭偷渡 第一係我當時仲係一個細路哥，驚黑夜 第二係我知道 既然我已經冒緊險，所以冇所謂 而且日頭冇咁多人偷渡 我覺得我可能會成功過到去 2006 年 2 月 15 日 我成功偷渡到中國 我當時 16 歲 我以為中國嘅生活會容易啲 因為嗰度有多啲食物 我以為多啲人會幫我 點知中國嘅生活比北韓仲艱難 因為我無自由 同埋成日擔心俾人捉返返去 幸運嘅係，幾個月後，我遇到一個人 佢掌管一個照應北韓人嘅地下組織 佢畀我住喺組織嗰度 係我咁多年嚟第一次有正餐食 同年，一個人幫我逃離中國 以難民嘅身份到達美國 我去美國嘅時候一句英文都唔識講 但係我嘅社工話畀我聽我要去讀高中 即使係北韓，我嘅成績一直都唔合格 （笑聲） 我連小學都未讀完 我記得我以前喺學校 每日至少都要打一次交 我對課本同圖書館毫無興趣 父親用盡辦法畀我好好學習 但係都係無用 去到一個地步係父親放棄咗我 佢話：「你唔再係我嘅仔喇！」 我當時得十一二歲 但係呢句話令我好心痛 但無論如何，一直到父親去世之前 我都係冇學習嘅動力 所以喺美國，佢哋叫我去讀高中 係有啲荒唐 我連中學都無讀過 我之所以決定去 都只係因為佢哋叫我去 但係我冇畀心機讀 但係有一日，我返到屋企 我嘅養母整咗雞翼做晚餐 食飯嘅時候，我想食多隻雞翼 但係我發現如果我食多一隻 咁其他人就唔夠食 所以我冇食到多一隻 當我得低頭望著我個碟嘅時候 我見到養父畀咗我最後一隻雞翼 我當時好開心 我望住坐喺我隔籬嘅佢 但佢只係好溫暖咁望咗我一眼，無講嘢 突然間我諗起我親生父親 我養父對我嘅愛令我諗起我嘅父親 即使挨餓，甚至極寒交迫 父親都願意將佢嘅食物畀咗我先 美國有咁多嘢食令我好唔習慣 因為畢竟我嘅父親死於饑荒 我嗰晚唯一嘅心願就係 為過生嘅父親煮一餐飯 嗰晚我仲諗緊仲可以 用咩嘢其他方式嚟榮耀佢 我嘅答案係 要努力讀書、接受美國最好嘅教育 嚟榮耀父親嘅犧牲 我開始認真咁學習 而且我人生第一次得到最佳學術獎 同埋喺中學嘅第一個學期 上咗優等生名錄 （掌聲） 嗰晚嘅雞翼改變咗我嘅人生 （笑聲） 「希望」係一樣個人嘅嘢 「希望」係其他人無法畀你嘅 你必須要相信希望 你必須要令自己相信希望 喺北韓，我令自己相信咗希望 希望將我帶到美國 但喺美國，我迷失咗，我唔知應該做咩 因為突然間我得到咁多自由 嗰次晚飯我嘅養父畀咗我方向 佢鼓勵我，畀咗我嚟美國生活嘅目的 我並唔係自己一個人就嚟到呢度 我雖然帶著希望嚟到美國 但係希望本身並唔夠嘅 一路上，有好多人幫我嚟到呢度 北韓人為咗生存而奮鬥 佢哋要強迫自己去生活落去 強迫自己抱著對生存嘅希望 但係如果無人幫手，係無法實現嘅 我留畀大家嘅說話就係︰ 對自己要有希望，同時要彼此守望相助 無論你住邊度，生活都可以艱難 我嘅養父當時並無諗過改變我嘅人生 但小小嘅關愛 你都可以改變一個人嘅一生 一片麵包可以令你消除飢餓感 擁有希望可以為你帶嚟食物 令你繼續生存落去 我好相信 你嘅愛同關心 可以救到一個北韓人嘅生命 同改變成千上萬個 仍然抱著生存希望嘅北韓人 多謝 （掌聲） 主持人： Joseph 多謝你同大家分享 非常私人而且特別嘅故事 我知道你一直無見過你嘅姐姐 正如你話齋將近有十年嘞 考慮到佢有可能睇到呢個大會 我哋想畀你同你姐姐講幾句 講者︰用韓文嗎？ 主持︰你可以先用英文然後再用韓文 (笑聲） 講者︰好嘅 但我覺得我唔會用韓文講好多 因為一講我就會淚流不止 努娜，已經有將近十年我無見到你喇 我只係想講我好掛住你，我愛你 你一定要嚟搵我，一定要好好生存 而且我… 我仍然冇放棄再見到你嘅希望 喺我見到你之前 我都會幸福咁生活落去 同埋努力讀書 而且我保證我唔會再喊 （笑聲） 係嘅，我只係希望能夠再見到你 如果你搵唔到我，我都會去搵你 我希望有一日會見返你 我可以同我媽咪都講兩句嗎？ 主持︰當然，請講 講者︰雖然我哋相處嘅時間唔多 但係我知道你依然愛我 並且你可能依然仲為我祈禱同掛住我 我只係想多謝你將我帶嚟呢個世界 多謝 （掌聲）