好高興可以响呢度

同大家分享我嘅心路歷程

講下輪椅

同埋呢張輪椅帶畀我嘅自由

十六年前我開始坐輪椅

一場大病

令我唔可以好似以前咁接觸世界

當我開始坐輪椅

佢帶畀我全新嘅自由

我曾經以為病後傷殘，下半世一定唔好過

但呢張輪椅就好似一件神奇玩具

我可以出返去吹風，大叫

可以出到街真係好爽

雖然重獲自由我真係好開心

但街外人對我嘅態度就完全唔同晒

佢哋好似當我透明

就好似我著咗件隱形斗篷咁

佢哋帶住一份成見嚟睇我

覺得我坐輪椅就一定會係點點點

當我問「一提起輪椅你哋會諗起乜嘢？」

佢哋會話「局限」、「恐慌」

「可憐」、「無自由」

我估我暗瓦底都受到呢啲成見影響

亦响深處令我對自己嘅睇法唔同咗

有一部份嘅自己好似疏遠咗咁樣

我再唔係由自己嘅觀點出發去審視自己

而係來來回回受其他人嘅睇法

影響我點睇自己

於是我覺得咁唔掂，我要創造自己嘅故事

關於呢個經歷

我要重新演繹，定義自我

[字幕] 尋找自我：在開創自己的故事時，
我們學會認真看待寫照生命的一字一句。Davis 2009

我開始做一啲作品

旨在同大家傳遞

我坐輪椅嘅份內喜悅同自由

我叫佢做能量椅 ── 去同個世界摙過

我將我內心嘅感受盡量傳遞出嚟

透過破格嘅攝影

去改寫當初我開始坐輪椅時

令我疏遠自己嘅外間成見

張輪椅變咗一件我可以又寫又畫嘅嘢

當我開始為自己嘅快樂同自由

留下印記

外界睇到我嘅作品時所有反應

都令我好雀躍

呢啲作品好似打開咗眼界

樂在其中嘅一切由我主導

表現到藝術創作

可以重塑一個人嘅自我

同時為司空見慣嘅嘢改變睇法，改變成見

當我2005年開始坐輪椅潛水

我發現潛水裝置無論對常人抑或坐輪椅嘅人

一樣响水底帶畀佢同樣嘅自由

但全裝上陣潛水，帶畀人嘅印象

係充滿刺激同歷奇

同時徹底改變外人對輪椅用者嘅睇法

我心諗：唔知兩件事擺埋一齊會點呢？

(笑聲) (掌聲)

最終我哋真係做咗部潛水輪椅

响過去七年

佢帶我體驗咗非一般嘅水底旅行

為咗令你哋明白我講嘅經歷

我想同大家分享呢件法寶

帶畀我嘅其中一段體驗

同埋佢帶咗我去一個幾咁精彩嘅世界

(音樂)

(掌聲)

呢個係我呢世人至今最精彩嘅體驗

以前種種都無得比

我基本上可以自由咁郁動

360度通行無阻

體驗至高無上嘅快樂同自由

實在喜出望外，妙不可言

而見證住呢件事嘅人都可以感同身受

佢哋對眼當堂發晒光

又會話：我都想要要部咁嘅嘢！

或者：如果你都做得到，我都一定得！

我覺得，因為嗰一刻

佢哋睇緊一件嘢

係佢地前所未見

或者超乎佢哋想像

打破晒「輪椅」兩隻字嘅成見

佢哋會重新睇呢件事

我覺得响新睇法出現嗰一刻

可能就開創咗新嘅自由

伸張到其他人嘅生命之中

對我嚟講，佢哋睇得到

差異嘅價值

箇中嘅快樂

而唔係著眼於損傷或者局限

用新觀點去睇世界

可以發掘出振奮人心嘅力量同喜悅

對我嚟講

輪椅係一部轉化器

其實我而家叫呢部潛水輪椅做「變身器」

因為事實上佢從後推我一把

幫我踏入全新嘅生命

揭開人生新一頁，對自我嘅新覺悟

另一方面

因為從來無人知

潛水輪潛應該係點

創造佢嘅事候

就等如創新一種睇法、認知、認同

而家呢種睇法入晒你哋腦喇

你哋都係作品嘅一部份

(掌聲)