今時今日，有四千萬個美國人 孭住一筆讀書債投身社會 佢哋屋企窮，要借錢讀大學 而家夾埋嘅債務有成一兆美金咁多 呢班畢業生乜嘢工都要試 為求還得清自己筆債 喺美國 連一個破咗產嘅爛賭二都翻身有望 但完全唔使指意 一個畢業生可以還清筆債 以前响美國 讀大學唔等於要負債纍纍咁畢業 我朋友阿 Paul 佢爸爸喺科羅拉多州立大學畢業 當年有退伍軍人法保障 嗰個年代 大學學費全免，又或者近乎零 因為政府覺得大專學歷對社會有益 但好景不常 輪到阿 Paul 喺同一間大學畢業嗰陣 英文系畢業嘅佢，要做住兼職嚟還債 卅年前 多數人都畀得起大學學費 你爭落嘅錢，畢業之前就可以還晒 但好景不常 輪到阿 Paul 個囡同樣步佢後塵 唯一唔同嘅係 五年前佢畢業嗰陣 孭住成身債 阿 Kate 同埋其他大學生都要借錢 因為大學學費經已貴到 好多美國家庭都負擔唔起 咁又點啫？ 借筆錢嚟投資一個貴價學位 只要第日還到錢，就唔成問題啦 有大學學歷，起碼有得賺多啲嘛 但問題嘅癥結就响呢度 連一個 2001 年畢業嘅人所賺嘅錢 比起 2013 年畢業嘅 Kate 仲要多出 10% 所以… 學費飆升 津貼少咗 家庭收入又縮咗水 個人收入微薄 唔怪得有多過四分一嘅畢業生 連要還債都還唔到 不過，最壞嘅時刻亦係最好嘅時刻 因為啲事實就攞喺响你面前，唔理唔得 今日我想講其中三個事實 1.2 兆美金嘅學債 明顯反映咗 大學教育經已淪為一種消費品 我哋講起教育就好似班資本家咁 將教育當係投資，愛嚟增強人力資本 訓練啲人出嚟做嘢 愛嚟將啲學生按等級分類 等啲僱主請人嗰陣容易啲 《美國新聞與世界報導》 公布大學排名嘅方式 十足啲消費報告評估啲洗衣機咁款 份報告用詞粗暴到極 叫啲老師做「服務提供者」 叫啲學生做「消費者」 社會學呀，莎士比亞呀 足球同埋科學呀 呢啲冚唪唥叫做「服務內容」 學業借貸好好賺 不過賺嗰個唔會係你 你嘅債務甚至養肥咗 成個學生借貸行業 呢個行頭其中兩條巨龍 Sallie Mae 同埋 Navient 公布上年總盈利一共有 12 億美金 學生貸款正正同樓宇按揭一樣 可以係捆綁式、套餐式同拆件式 响華爾街出售 啲大專院校 投資呢啲證券貸款嘅時候 頭尾賺兩轉 首先賺你筆學費 跟住賺你啲息口 睇見盤生意咁好賺 大家仲會奇怪嗰啲高等教育辦學團體 點解會用啲失實嘅宣傳手段 嚟推銷利誘 藉教育嚟剝削緊乜都唔知嘅學生嗎？ 第三： 學位經已淪為品牌 當年我有個老師寫話： 「當學生變成一班消費者， 佢哋就會喺度盲追學位，鬥生鬥死。」 正如蘋果不斷向人推銷新款 iPhone 做教育嘅亦可以不斷向人推銷學位 昨日嘅中學，變成今日嘅大學 一早有人咁講過 但點解要停喺呢一步？ 大學可以不斷招攬人讀文憑，讀完再讀 再讀碩士學位、博士學位 佢哋仲推銷專上教育係地位嘅象徵 買學位 同你買架凌志、買個 LV 一樣 係買嚟抬高身價 靠佢，你可以招人妒忌 學位已經淪為品牌 但係呢啲真相成日畀一片叫賣聲掩埋 日日硬係有班政客 喺個公仔箱度同我哋講： 「大學學位好重要， 有佢先可以扶搖直上、做到中產。」 通常理據就係專上學歷競爭力高： 大專畢業比起高中畢業平均賺多 56% 我哋再細心啲解讀個數字 因為驟眼睇 個數字好似喺度推翻緊嗰啲 「大學畢業做收銀沖咖啡」 之類嘅新聞咁 响 100 個有專上學歷嘅人裏面 45 個冇順利畢業 原因好多，財政困難係其一 嗰 55 個順利畢業嘅人 有兩個冇嘢做 有 18 個搵唔到長工 雖然大學畢業生搵得多過中學畢業生 但究竟佢哋夠唔夠填嗰筆巨債 同埋你讀書嗰陣冇咗嘅搵錢機會呢？ 依家連經濟學家都承認 只有順利畢到業嘅大學生先還得哂 而純粹係因為中學畢業生嘅薪水 幾廿年嚟大幅縮水 咁多年嚟 有高中學歷嘅人 付出同收入唔成正比 若果佢哋可以賺返佢哋應得嘅水平 咁讀大學對好多人嚟講肯定係蝕大本 大學畢業生薪水嘅溢價 我睇都係靠高中畢業生倒貼而嚟 有三份二嘅大學畢業生發現 工作未如理想 佢哋唔睇好前景 或者直情覺得前途暗淡 而正正係佢哋要去承受 學債帶嚟嘅沉重負擔 最心悒嘅係，正正係佢哋 畀人最落力用學位升值呢個理由氹落搭 咁嘅銷售伎倆，自私自利不特止 仲係麻木不仁 咁我哋做啲乜嘢好？ 如果學生同家長都當學位係商品呢？ 個個似乎都咁睇 買任何商品嗰陣 你會要人哋清楚交代件貨嘅詳情 你去買藥 佢會寫明有咩副作用 你買件大學商品嗰陣 佢需要有張警告標籤 畀消費者有權揀 知情下做決定 你去買車 佢會話你知每加侖預計跑到幾多里 但冇人會預計到讀完大學 譬如讀完科「加拿大研究」前景會係點 真係有呢個學系㗎 假如有個應用程式可以話個前景我哋知？ 計吓個學費同預期人工係咪成正比 暫且叫個應用程式做 Income-Based Tuition 或者 IBT 啦 係你哋其中一個人設計而嚟 （笑聲） 正視返你嘅前途問題 （笑聲） IBT 呢個應用程式有三個好處 用戶可以知道 讀完某某大學同埋學系，人工會係幾多 用家有咗呢啲資訊 就冇咁易 畀啲無良推銷員氹得掂 同時可以揀得明智啲 到時仲邊有人會交一筆 高過預期人工 15% 嘅學費出嚟呢? IBT 有第二個好處 透過顯示學費同薪金嘅關係 大學管理層必須要運用新思維 去妥善釐訂學費 譬如 大部份嘅學生不論學系，學費劃一 呢個制度明顯好唔公平，需要改革 工程系嘅學生通常用到嘅資源 譬如設施、實驗室、教職員呢啲 會多過哲學系嘅學生 但呢班哲學生 變相資助緊班工程系學生 第時人工高一截嘅工程系學生 點解要兩個人買嘅貨一樣 畀嘅錢一樣 但其中一個淨係享用到 一半甚或三份一呢？ 事實上，某啲學系嘅畢業生 拎緊人工嘅 25% 嚟還債 但另一啲拎 5% 就得 咁學科收費合理啲就會消除呢啲不公平 當然啦，而家呢堆資料… 我諗在座會有人走去搞㗎可？ 呢堆資料要有人整理好 譬如交畀會計公司做審計 避免畀啲統計數字呃 統計大家都識㗎可？ 除咗正話兩個好處 第三個，而且係 IBT 最大嘅好處 就係令美國人唔使驚再陷入財困 唔使再驚買咗件爛貨返嚟 或者某個時刻 新舊兩代嘅美國人重新發現 正如頭先嗰位講者所講 對知識嘅追求同熱愛 開始學啲想學嘅嘢 鍾意自己學緊嘅嘢，隨心而行 深受知識所啟發 去探索自己渴望探索嘅事物 望返轉頭，其實係阿 Eric 同 Kevin 兩年前 正正係呢一班後生仔 佢哋鼓勵我，同我共事 到到而家 依然落力研究緊美國呢個學生貸款問題 好多謝大家！ （鼓掌）